Inviât il progjet “Esercizis Comerciâi Virtuôs”

Il Comun di Udin, intune cun Legambiente dal Friûl – VJ, al à inviât il progjet “Esercizis Comerciâi Virtuôs” che al ufrìs ai imprenditôrs une valutazion dai consums eletrics e termics de lôr ativitât in maniere di permeti di intervignî par rindiju plui eficients. La iniziative, che e cjape za dentri une trentine di esercizis comerciâi, e je stade presentade vuê a palaç D’Aronco dal assessôr pe cualitât de citât Lorenzo Croattini e di Cristiano Gillardi di Legambiente. Ai 17 di Dicembar chest progjet, che al jentre tra lis azions che il Comun al à metût dentri intal so Plan di Azion pe Energjie Sostignibile, al sarà presentât plui in detai, ancje parcè che i nivei di adesion a son diviers. “La propueste – al spieghe Gillardi – e à chê di incidi sui consums intal terziari, prin di dut cul misurâju, in maniere che ognidun al sedi cussient de sô olme energjetiche ancje sul lavôr; cheste cognossince e je il pont di dulà partî par permeti a ducj i esercizis comerciâi di viodi, là che al è pussibil, cemût limitâ i lôr consums cun benefici sei pal ambient, sei pal lôr belanç. Cu la poie di Legambiente lis impresis che a volaran a podaran misurâ i lôr consums e impegnâsi a meti in vore une o plui azions pal sparagn energjetic.