Lavôrs di utilitât sociâl: progjets par altris 45 puescj

Te sô riunion di vuê, la Zonte comunâl e à fat bon un grup di progjets di lavôr di utilitât sociâl di presentâ in Regjon pe domande di contribût. Su la fonde dal plan metût jù il Comun al metarà a disposizion 19 progjets che a daran di vore in dut a 45 personis. Si trate di un intervent là che la Aministrazion comunâl e metarà ancje 107 mil euros dai siei fonts. Dai 45 puescj disponibii, che a duraran 52 setemanis, 8 a son di categorie C, ven a dî aministratîfs, 27 a son di categorie B e chei altris 10 puescj a saran assegnâts in convenzion cu lis scuelis (8) e cu la cuesture (2). I aministratîfs a varan pe plui part di viodi dal miorament dai servizis sociâi, dal servizi des jentradis e di chel pai apalts. Par chel che al rivuarde invezit i colaboradôrs di categorie B, la la maiorance e sarà impegnade intai servizis scolastics. Chei altris puescj a saran dividûts framieç di diviers servizis, si va des infrastruturis ae viabilitât, dai uficis demografics ae polizie locâl, dal setôr socioassistenziâl ae edilizie, de comunicazion ae biblioteche civiche. Daûr de leç regjonâl a puedin jessi impegnâts par lavôrs di utilitât sociâl i citadins che a son residents in Friûl – Vignesie Julie e che si cjatin in casse integrazion a zero oris, in mobilitât o cuntun altri tratament speciâl di disocupazion.