Friuli Doc, novitâts tecnologjichis e tai sponsor

La edizion XIX di Friuli Doc, la plui grande rassegne enogastronomiche regjonâl, in program a Udin dai 12 ai 15 di Setembar e à chê di proponisi al public cuntune muse simpri plui moderne e al pas cui timps. Cun cheste logjiche “innov@ctors”, spin-off de Universitât di Udin e CrediFriuli, cu lis lôr risorsis, a àn creât une aplicazion par smartphone e par tablet disponibile par talian, inglês e todesc che si podarà discjariâ a partî dai 5 di Setembar e che i fasarà di vuide a turiscj e udinês intal scuvierzi percors, events e savôrs de manifestazion. “La nestre volontât – al à declarât l’assessôr pes Ativitâts produtivis e turistichis, Alessandro Venanzi – e je chê di mantignî la tradizion, ma cuntun voli su la inovazion e chest imprest al ufrìs une oportunitât in plui par fâs scuvierzi Friuli Doc, creant percors personalizâts daûr des preferencis e des dibisugnis di ognidun”. Cun di fat, il program al permetarà di cjatâ fûr, in detai e dì par dì, ducj i events de rassegne, ma ancje la logjistiche des diviersis postazions e lis mapis cui lûcs de fieste. Si cjataran po percors conseâts e cetantis informazions di servizi, cence dismenteâ la sezion “My FriuliDOC” che e permetarà ai utents di personalizâ e condividi la lôr esperience dentri de manifestazion. Un altri aspiet significatîf di cheste edizion di Friuli Doc e je la grande partecipazion dai sponsor. In plui de Universitât di Udin e di CrediFriuli cun “innov@ctors, a puartâ il lôr contribût a son ancje Goccia di Carnia e Italpol, cuntun contribût totâl che al rive a trente mil euros. “Intun moment là che lis aministrazions publichis a fasin simpri plui fature a cjatâ fûr risorsis – al à dite l’assessôr Venanzi – al è impuartant che ciertis aziendis a dedin une man par valorizâ, adun cui lôr progjets, ancje ce che di miôr al ufrìs il teritori e si spere che chestis sponsorizazions a vedin une continuitât e une condivision progjetuâl ancje tai prossims agns”.