Dulinvie, apontaments ai 30 e 31 di Avost

Inte suaze dal Astât udinês e rive ancje la edizion numar 13 di Dulinvie, percors di culture plurâl in Friûl, che e previôt doi apontaments in program vinars ai 30 e sabide ai 31 di Avost. La edizion di chest an e à par non ‘Cinquant’anni di solitudine’ e, a cincuante agns de nassite de Regjon Autonome Friûl – Vignesie Julie, e propon riflessions e confronts sui temis de autonomie, de specialitât, de identitât e des culturis. Vinars ai 30 di Avost, a nûf mancul un cuart di sere (20.45) alì dal Oratori dal Crist (Largo Ospedale Vecchio), si varà une cjacarade cun Sergio Cecotti curade di William Cisilino par contribuî a di une definizion dal Friûl a cjaval tra storie, storiis, modei e stereotips. Sabide ai 31 di Avost, simpri ae stesse ore e tal stes sît, Leopoldo Coen e Franco Iacop, moderâts di Omar Monestier, a fevelaran di belançs e prospetivis di cincuante agns di autonomie regjonâl.