Sabide ai 6 di Setembar a tornin i artiscj di strade

Dopo dal sucès dal an passât, al torne ancje intal 2013, simpri inte suaze di UdinEstate, il Festival dai artiscj di strade. Une edizion, chê in program intal centri storic di Udin ai 6 di Setembar, che e je peade al festival dai artiscj di strade di Gardiscje e di Starançan, in maniere di svilupâ une vere rassegne regjonâl dai artiscj di strade. “Contrari di ce che dispès si pense – al à dite l’assessôr comunâl pe culture Federico Pirone intant de presentazion – chê di strade e je une art plene di dignitât, in stât di animâ lis placis e di tirâ dentri dibot e in maniere direte grancj e piçui”. Par dut il dopodimisdì dai 6 di Setembar, a tacâ di trê (15.00), la citât e sarà animade dai zûcs, des acrobaziis, des gjerometis e dai spetacui di vincj artiscj che a rivin de Italie e di diviers paîs dal mont (de Irlande ae Spagne, de Australie al Venezuela), cence dismenteâ lis realtâts che a zuin “in cjase” tant che la Compagnia del Carro di Starançan e il “Circo all’incirca” di Udin. Diviers i lûcs dal centri là che i artiscj a mostraran lis lôr esibizions. Par informazions plui in detai si pues cjapâ contat cul PuntoInforma dal Comun al 0432 414717.