Plen acès sul sît dal Comun al plan regoladôr gjenerâl

Di cumò indenant i citadins di Udin, in plui di vê la pussibilitât di viodi il plan regoladôr gjenerâl de citât dal sît internet dal Comun, a podaran consultâ il strument urbanistic su plui plans e fint insom, cognossi la destinazion des diviersis areis e fintremai la normative di riferiment. Dut chest in maniere intuitive e cence bisugne di discjariâ programs specifics, in pratiche dome cuntun clic. Un tant al è pussibil in gracie dal progjet PRGEvo, un software metût adun de societât regjonâl Insiel e che la Regjon e à concedût sore nuie ai Comuns convenzionâts. A presentâ il lavôr svilupât adun di Regjon, Comun di Udin e Insiel a son stâts vuê il sindic Furio Honsell, compagnât dai assessôrs Gabriele Giacomini e Carlo Giacomello, il president e il diretôr di Insiel Spa Sergio Brischi e Paolo Viola, e Luca Moratto dal Servizi sistemis informatîfs e e-government de Regjon. Chest gnûf strument al jentre intes azions par inmodernâ la aministrazion publiche e par rindile plui trasparente. Par mieç di imprescj come chel chi, cun di plui, no si fâs un servizi dome ai citadins, ma ancje ai professioniscj e ae operadôrs dal setôr.