“Tramis contemporaniis” in mostre al Museu Etnografic

Vistîts, acessoris, materiâi de tradizion tornâts a inventâ par dâi vite a oparis cun tramis gnovis e origjinâls, ma chel istès ben inlidrisadis te nestre tiere e in stât di peâsi cui fîi de memorie. Al è chest il sens e il teme de mostre “Trame contemporanee” che sabide ai 7 di Setembar a sîs sot sere (18.00) si screarà alì dal museu Etnografic dal Friûl. Un progjet espositîf che al nas de colaborazion tra il museu e la associazion culturâl “Noi…dell’arte” e de creativitât di dîs artistis (Flavia Caffi, Rosanna Colloricchio, Liviana Di Giusto, Loredana Giacomini, Alice Gregori, Irene Mazzon, Antonella Palomba, Antonella Pizzolongo, Flavia Turel, Elena Sanguankeo) che a lavorin cun materiâi diferents – de lane al metal e fintremai la plastiche – par rivâ a svilupâ oparis artistichis che a àn tant che lidrîs in comun la tiessidure. La mostre e reste vierte fin ai 6 di Otubar cun orari 10.30 – 19.00 dal martars ae domenie. Cul prin di Otubar però l’orari di sierade al ven anticipât di dôs oris.