Presentade la gnove edizion di Friuli Doc
Conference stampe di presentazion vuê par Friuli Doc, la plui impuartante manifestazion enogastronomiche dal Friûl – Vignesie Julie. A presentâ i contignûts de edizion numar XIX de manifestazion a son stâts il sindic Furio Honsell, l’assessôr comunâl pes ativitâts produtivis Alessandro Venanzi, il conseîr regjonâl Vincenzo Martines, il diretôr dal Ersa Mirko Bellini, Maria Lucia Pilutti in rapresentance de Cjamare di Cumierç di Udin, e Mauro Damiani pe Confartesanât udinese. La scree di Friuli Doc si davuelzarà joibe ai 12 di Setembar a cinc e mieze dopodimisdì (17.30) in place Libertà, e a fâ di santul al sarà il chef internazionâl Joe Bastianich. Prodot protagonist de edizion 2013 al sarà il vin, che al sarà l’argoment al centri des cunvignis, des cercis e dai incuintris che a van sot de etichete “Storie di vite e di vino”.
La mape de manifestazion no cambiarà rispiet al an passât. Place XX Settembre i darà acet al Ersa, intant che Confartesanât e sarà cui siei associâts in Marcjât Vieri e in vie Vittorio Veneto. In place Sant Jacum a cjataran puest i prodots vitivinicui di Buri e Caprive, in place Garibaldi si varà invezit il Consorzi dai vins di Aquilee, ma ancje la sagre des patatis di Godie, lis produzions di Pontebe e la cooperative dai pescjadôrs di Triest. La Valcjanâl e sarà di cjase in slarc Ospedale Vecchio, la Comunitât montane de Cjargne e lis pro loco di Nimis e Faedis a saran tra place dal Domo, vie Vittorio Veneto e vie S. Francesco. Sul splaç dal Cjistiel si cjataran i prodots de Comunitât culinâr dal Friûl, la sagre de ocje di Morsan e sarà in plaçute Belloni e il frico di Cjarpât in place S. Cristoforo. In place Venerio si varan prodots che a rivin des valadis de Tor e dal Nadison, ma ancje di Magnan, Seorgnan, Glemone, S. Zorç di Noiâr, Bagnarie e Atimis. Altris produzions tipichis a cjataran po spazi ancje intes viis Cavour, Stringher e Savorgnane.
Friuli Doc però nol è dome enogastronomie. Dilunc vie des cuatri zornadis de manifestazion, si varan ancje cetancj apontaments culturâi. Un centenâr, di fat, i events i programs cun passe 500 artiscj impegnâts. Cence dismenteâ po lis animazions pai fruts. Confermât, ancje ta cheste edizion, il conciert finâl cu la esibizion, domenie ai 15 di Setembar a nûf e mieze di sere (21.30) in place Libertà, de cjantante Simona Molinari. Tra lis novitâts di chest an si varan i laboratoris di cusine e di educazion alimentâr pai fruts inmaneâts di Damatrà alì dal Zardins dal Torso, là che si varà ancje “Ecovia”, laboratoris educatîfs par fruts e fameis su tematichis ambientâls. Une gnove propueste e je po ancje chê di un ristorant vegan e vegjetarian li de ex librarie Carducci (place XX Settembre).
A restin invezit i stes dal an passât i oraris de manifestazion, cu la musiche che e podarà lâ indenant fin undis e mieze di sere (23.30) la joibe, fin a miezegnot vinars e domenie, e fintremai la une di gnot la sabide.
Dutis lis informazions in detai si puedin cjatâ sul sît dal Comun di Udin , alì dal PuntoInforma di vie Savorgnane 12 (tel. 0432 414717/718) o ancje su la aplicazion par smartphone e tablet metude adun di pueste di “innov@ctors”.