Al tache “Udinesmart”, doi dîs su la citadinance digjtâl

Doman, joibe ai 6 di Dicembar, e vinars ai 7 in diviers sîts de citât si davuelzarà Udinesmart, un event inmaneât dal Comun di Udin intune cun altris ents e istituzions dal teritori. Il teme principâl al è chel dal mont dal digjtâl e de inovazion, de art al gjornalisim 2.0 passant pe trasparence inte aministrazion publiche. L’assessôr pe inovazion Paolo Coppola al à fevelât dal event tant che di une ocasion par fâ il pont su la impuartance des gnovis tecnologjiis a nivel strategjic pal svilup dal teritori. Al è fondamentâl – al à dite Coppola intal so intervent di presentazion dal event – metisi in rêt e coordenâsi tes liniis di difusion des cognossincis in chest setôr, viodût che la competitivitât, il svilup e la creazion di gnûfs puescj di vore a saran simpri di plui dentri di cheste suaze. La manifestazion si screarà doman a 9 di buinore alì dal cine Visionario.