Presentât il belanç e lis gnovis sul servizi “Zero Tolerance”

A son stâts presentâts intune conference stampe inte sale dai riceviments di palaç D’Aronco la ativitât e un gnûf servizi dal sportel “Zero Tolerance”, iniziative inmaneade dal Comun in colaborazion cu la cuesture di Udin e cul comant provinciâl dai carabinîrs par prevignî e tutelâ lis feminis vitimis di violence, di maltrataments o di persecuzions. Intal incuintri a son stâts presentâts ancje dai dâts su la ativitât dal sportel “Zero Tolerance” dal moment de sô nassite intal 1999. Ae conference stampe a jerin presints il sindic, Furio Honsell, la assessore pe salût e pe ecuitât sociâl, Simona Luguori, il cuestôr di Udin, Antonio Tozzi, e il comandant provinciâl dai carabinîrs, Roberto Del Piano.