Udin par Furlan a Friuli Doc

Dentri dal progjet integrât di comunicazion istituzionâl in lenghe furlane fat de cooperative Informazione Friulana pal Comun, la manifestazion enogastronomiche Friuli Doc e sarà contade in direte di vinars ai 13 a domenie ai 15 di Setembar su lis frecuencis di Radio Onde Furlane (90 Mhz te plui part dal Friûl; 90.2 e 106.5 in Cjargne; 96.6 a Colonia Caroya in Argjentine; in dut il mont in streaming ae direzion www.ondefurlane.eu) cun trasmissions di pueste che a vignaran fatis li de postazion de “radio libare dai furlans” che si cjate in Place dai Grans. I colegaments cu la place e i inzornanements su Friuli Doc a vignaran fats ai 13, ai 14, ai 15 di Setembar vie pe buinore, di 10 a misdì.