Al Comun il premi “Klimaenergy Award 2013”

Il Comun si conferme un pont di riferiment a nivel talian intal setôr de sostignibilitât ambientâl e energjetiche. Cun di fat la capitâl dal Friûl e à cjapât il premi “Klimaenergy Award 2013” pe categorie dai Comuns tra i 20 e i 150 mil abitants. Il premi, bandît di Fiera Bolzano adun cu la Fondazion de Casse di sparagn di Bolzan e in colaborazion cu la Provincie Autonome di Bolzan, il Ministeri pal ambient, il TIS Innovation Park, Legambiente, Eurac Research, la Anci e la Acri, al sarà consegnât vuê a Bolzan. Cun di plui vuê il Comun al è protagonist, adun cun Emas Club dal Friûl – VJ, de cunvigne “Emas e Friûl Vignesie Julie tra presint e futûr”, in program inte Cjamare di cumierç di Triest. L’ Emas Club dal Friûl – VJ, nassût il mês di Avrîl dal 2012, e je une iniziative che si propon di valorizâ la impuartance dai sistemis di gjestion ambientâl par miorâ la eficacitât des azions de aministrazion comunâl par rivâ ai obietîfs di sostignibilitât che l’ent si è dât, sei intal setôr ambientâl che energjetic. Aa cunvigne a intervegnin la coordenadore dal comitât sientific, Agnese Presotto, il president dal Emas regjonâl, Roger Neri, il sindic di Udin, Furio Honsell, e il segretari gjenerâl de Cjamare di Cumierç di Triest, Stefano Patriarca. A nivel talian il Comun di Udin al è un dai cuatri cjâfs lûc di provincie a vê otignût la certificazion Emas, adun cun Belum, Mantue e Ravenna.