Gnove edizion dal progjet “SAVÊ”

A son za 8700, par 414 classis, i fruts iscrits intes iniziativis fatis indenant dal Comun inte suaze dal progjet “SAVÊ- Scuele, Ative, Vierte, Educative”. Ancje chest an la aministrazion comunâl e met a disposizion di dutis lis scuelis de infanzie, primariis e secondariis di prin e secont grât de citât percors e ativitâts educativis. Si trate, intal specific, di une centenâr di iniziativis, progjets e events dâts dongje in 7 sezions tematichis: Citadinance e partecipazion, Art e teritori, Zûc e sport, Salût e sigurece, Storie e tradizions, Siencis-ambient-energjie, Lenghe e comunicazion. A son 8 i uficis comunâi impegnâts intes ativitâts dai diviers percors: la Agjenzie Zovins, la biblioteche civiche Joppi, l’ufici “Citât sane”, la Ludoteche, il Ludobus, il museu furlan di storie naturâl, la polizie locâl, i museus civics e l’ufici progjets educatîfs 3-14 agns. Il progjet – a àn fat savê de aministrazion comunâl – al è stât metût adun in graciis dal acuardi tra il Comun e i istitûts scolastics. Lis propuestis educativis a previodin 3 tipologjiis di intervents: intervents didatics in classe o in altris puescj de citât, ativitâts didatichis struturadis su plui azions e events suntun teme specific.