Viertis lis iscrizions pe edizion 2013 di “CamminaMenti”

E je pronte par partî la seconde edizion di “CamminaMenti”. Iniziative che il Comun, dopo dal sucès dal an passât, al torne a proponi intal mês di Otubar in cuatri circoscrizions de citât cun percors che a àn chê di judâ lis personis di une cierte etât a tignî il cjâf in moviment. Cualis sono lis ativitâts in program? Esercitazions su la memorie, percors di logjiche e matematiche, lezions di lenghis forestis, zûcs e enigmistiche, moments di informazion su cemût che al lavore il nestri çurviel, tra lis novitâts di cheste edizion o cjatìn po musiche, tradizions popolârs, micologjie e botaniche, ambient e paisaç, laboratoris interculturâi e altri ancjemò. In spiete che i cors si inviin, a son viertis però lis iscrizions che a puedin jessi dadis jù alì de associazion Alzheimer (telefon 0432 25555), alì de associazion Judìnsi (telefon 0432 233756) o ancje alì de cooperative Pervinca (telefon 0432 1740123). Ducj i incuintris, che a son indreçâts aes personis che a àn passât i 65 agns, a son sore nuie, a son tignûts di esperts e si davuelzaran alì des salis comunâls de Prime, de Tierce, de Cuinte e de Setime circoscrizion. Cuntune percentuâl di anzians che e sfilie il 24% dal totâl, Udin e je une des citâts plui indenant cui agns dentri dal stât talian. Un dât che duncje al conferme la impuartance di promovi stîi di vite juscj e ativitâts pensadis par invecjâ in salût. La iniziative, promovude dal Comun par mieç dai uficis “Città Sane”, dal Distret udinês de Aziende pai Servizis Sanitaris dal Friûl di Mieç e de associazion Alzheimer, e je pussibile in gracie de colaborazion di diviers sogjets che a operin sul teritori. “Svilupâ stîi di vite corets – al spieghe il sindic Furio Honsell – al jude a fâ une buine ativitât di prevenzion e a promovi un invecjament in salût. Meti in zûc lis funzions cognitivis, di fat, al è un obietîf impuartant sei pai efiets positîfs che a divegnin dal mantignîlis in ativitât, sei tant che rispueste ae pôre des personis anzianis di lâ al mancul”.