Fieste dai colôrs intal oratori dal Carmine

Domenie ai 29 di Setembar, a tacâ di 3 dopomisdì,  l’oratori dal Carmine, in vie Aquilee, i darà acet ae gnove edizion de “Fieste dai colôrs” inmaneade de Prime circoscrizion dal Comun di Udin inte suaze dal progjet “Culturis a 360°”. Par dut il dopomisdì la iniziative e proponarà un program siôr di musiche, bai, flabis, cusine e zûcs che a rivin di diviersis bandis dal mont: Cine, Filipinis, Ghana,  Ucraine, Americhe Latine, Italie e Friûl. Par altri, intal claustri dal oratori, si pues za viodi la mostre fotografiche “Il mondo è a casa nostra! Persone, cose e colori del mondo nella nostra città”.  La esposizion e je vierte dal lunis ae sabide di 8 e mieze di matine a misdì e mieç (08.30 – 12.30), intant che vuê e doman si podarà viodile ancje intal dopomisdì di 3 a 7 (15.00 – 19.00). La jentrade e je sore nuie.