Sabide ai 5 di Otubar gnove Zornade de Salût

Dopo dal sucès de edizion di Jugn, sabide ai 5 di Otubar e torne une gnove “Zornade de Salût” cuntun program siôr di ativitâts che si davuelzaran ator pe citât cun chê di promovi stîi di vite plui sans. I 21 apontaments cu la vite ative, sore nuie e vierts a ducj, a laran a animâ il parc Moretti, place dai Grans (XX Settembre) e place S. Jacum (Matteotti) di 3 a 6 dopomisdì (15.00 – 18.00). A vierzi la manifestazion e sarà però une cjaminade dilunc des roiis che e tacarà a 2 dopomisdì alì dal parc Moretti. Tantis lis ativitâts in program: dal pilates ai rollerblades, de gjinastiche artistiche al yoga, ma ancje bocis, il taiji, baletalzei, judo, boxe, hip hop e altri ancjemò. “L’event al jentre tra lis tantis ativitâts promovudis de aministrazion comunâl inte suaze dal program european “Citât Sanis” – e à spiegât la assessore pal sport, pe educazion e pai stîi di vite, Raffaella Basana – cun chê di sburtâ i citadins a cjapâ sù stîi di vite sans e di ufrî ocasions par socializâ e pe inclusion sociâl”. La Zornade e je ancje la ocasion par lançâ in citât “Moveweek”, un grues event european di sport inmaneât de International Sport and Culture Association, là che, di chest an, al è dentri ancje il Comun di Udin.