Il Comun al spint mancul pes incarghis esternis

Intai prins sîs mês dal 2013 lis incarghis professionâls assegnadis dal Comun a rimontin a 279 mil euros a sporc. Sù par jù la metât de spese vude inte stesse dade dal 2012 e cuasi un tierç in mancul rispiet ai ultins sîs mês dal an passât. La vôs di spese plui gruesse e je chê pes incarghis dadis par lavôrs publics cuntun totâl che al è tor dai 152 mil euros. Chês altris incarghis si riferissin invezit al setôr legâl cuntune spese tor dai 52 mil euros, ae culture cun passe 15 mil euros e ai organisims di valutazion cuntun totâl di 12 mil e 500 euros. Intai ultins agns lis cifris impegnadis de aministrazion comunâl pe assegnazion di incarghis esternis a àn mostrât une diminuzion significative.