“Energia in gioco”, a scuele di energjie responsabile

E je stade presentade vuê alì dal cine Visionario la edizion 2013 di “Energia in gioco”, la manifestazion che ancje chest an e proponarà cetancj apontaments che a àn chê di promovi compuartaments responsabii intal ûs de energjie. L’event, che al à la poie di vincj partners uficiâi, al ufrìs une cuarantine di apontaments che si davuelzaran dai 15 ai 19 di Otubar intai spazis de Ludoteche comunâl e intai zardins dal Tors. Intal program si cjate un pôc di dut, dai laboratoris creatîfs ai esperiments su lis trasformazions energjetichis, dai percors par scuvierzi lis risorsis rinovabilis ae esplorazion dai fenomens energjetics traviers dal zûc, ma ancje proiezions cinematografichis, leturis, seminaris e esposizions leâts al mont de energjie. I apontaments de buinore a saran dedicâts aes scuelis, intant che chei dal dopomisdì a saran vierts a ducj i citadins. Tra lis novitâts di chest an si à la partecipazion del CEC e dal CISM (International Centre for Mechanical Sciences), intant che a vegnin confermadis la colaborazion de Universitât, des associazions ambientalistis, de Net, de Amga, de Aziende pai Servizis Sanitaris dal Friûl di Mieç e de Agjenzie pe Energjie dal Friûl – Vignesie Julie. Cun cheste edizion, ogni an si varà un argoment che al fasarà di ispirazion pai diviers apontaments: si tache cu la aghe, par passâ po al aiar intal 2014, ae tiere intal 2015 e al fûc intal 2016. Par informazions e prenotazions si pues contatâ la Ludoteche comunâl al 0432 271677 o al 0432 271756.