Belanç sui incuintris cui operadôrs dal cumierç

Ai 7 di Otubar si son sierâts i incuintris de aministrazion comunâl cui operadôrs dal cumierç, l’assessôr pes ativitâts produtivis e turistichis, Alessandro Venanzi, al à fat cussì un belanç su cheste iniziative che si è svilupade a cjaval tra Setembar e Otubar cun dîs apontaments ator pe citât. “O soi sodisfat sei pe partecipazion, sei pai contignûts dal confront che si à svilupât cun ducj i operadôrs” al à dite l’assessôr che al à po spiegât che, in plui di fâ il pont cun cui che al lavore ogni dì sul cjamp e cjapâ sù lis lôr propuestis par rilançâ il cumierç citadin, la iniziative e veve chê di scurtâ la distance tra lis istituzions e i operadôrs dal setôr. Venanzi al à po zontât che lis ideis cjapadis sù intant dai incuintris a saran cumò metudis adun, tamesadis e condividudis ancje cun chei altris assessorâts, se pussibil za dentri de fin dal mês.