Ancje Udin al partecipe ae Zornade taliane dal cjaminâ

Ancje Udin al parteciparà ae Zornade taliane dal cjaminâ in program pai 13 di Otubar. La iniziative e nas cun chê di sensibilizâ i citadins e lis istituzions su temis tant che la cualitât de vite intes areis urbanis e la riduzion des emissions incuinants. La aministrazion comunâl e aderìs ae manifestazion cun doi events. Si tache vinars ai 11 di Otubar cui frutats des mediis “A. Manzoni” impegnâts intun percors di ecorienteering intal centri storic: iniziative fate in colaborazion cu la Uisp inte suaze dai percors educatîfs dal progjet SAVÊ. Domenie ai 13 di Otubar, invezit, a 10 di matine si cjatisi in place a Godie cuntune cjaminade di 5 chilometris vuidade di Andrea Romanini dal ufici Agjende 21 dal Comun di Udin: un percors di sù par jù dôs oris che al scjavaçarà lis placis di Godie e di Beivârs, i prâts vieris dal parc de Tor, fors e mulins antîcs, orts urbans e altri ancjemò. L’invît al è chel di lassâ la machine a cjase e rivâ sul puest cul autobus. Ancje par chest la Saf e fasarà une corse in plui de linie 7 cun partence de stazion feroviarie a 9.15 e di Godie a 12.45.