Gnovis iniziativis pal mês de prevenzion cuintri dai tumôrs

Al torne ancje chest an il mês de prevenzion cu lis iniziativis inmaneadis in Otubar de sezion furlane de Lilt, la Leghe taliane pe lote cuintri dai tumôrs, in colaborazion cul Comun di Udin e la delegazion di Udin de Academie dal Pevaroncin. Al centri dal program si varà la campagne di prevenzion dal tumôr al pet “Nastro Rosa” che e ufrìs par dut il mês e in forme gratuite visitis e informazions su la prevenzion alì dai centris e dai ambulatoris de Lilt e tra chescj ancje il Centri “Nella Arteni” di vie Francesco di Manzano a Udin (par plui informazions si pues telefonâ al 0432 548999 e lâ sul sît www.legatumoriudine.it ). Sabide ai 12 e domenie ai 13 di Otubar in vie Cavour e torne po ancje la manifestazion dedicade al mangjâ san inmaneade de delegazion di Udin de Academie dal Pevaroncin. Vinars ai 18 di Otubar, simpri inte suaze dal mês de prevenzion, intal auditorium Zanon la Lilt e proponarà, adun cu la Provincie, un conciert cun jentrade libare dal grup Nuovo Mondo Ensemble. Sabide ai 19 di Otubar invezit, in sale Ajace, la campagne “Nastro Rosa” e sarà al centri de cunvigne “Sessualitât e cancar” inmaneade de Consulte feminine de Lilt.