Ultins dîs par candidâsi pal Consei comunâl dai fruts

Cul an scolastic gnûf si varà ancje un gnûf Consei comunâl dai fruts e dai fantacins che a àn ancjemò timp fin ai 18 di Otubar par presentâ la lôr candidature. Lis elezions si davuelzaran po inte prime setemane di Novembar in dutis lis scuelis dal Comun di Udin e a saran viertis a ducj i arlêfs des classis cuartis e cuintis des primariis e des classis primis, secondis e tiercis des secondariis di prin grât. Ogni istitût comprensîf al à dirit a elei cuatri conseîrs, intant che ta chês altris scuelis si puedin elei doi conseîrs. Il Consei comunâl dai fruts e dai fantacins al è formât di un massim di 22 elets che a àn di vê tra i 9 e i 14 agns. Ce si aial di fâ par candidâsi? Baste jemplâ il modul che al è stât dât fûr in dutis lis scuelis de citât. Intal modul si à di proponi un argoment che si volarès che il Consei al frontàs, une ativitât di puartâ insom dentri dal Mai dal 2014 e une sorte di manifest eletorâl. Il lavôr e i apontaments di chest organisim si pues cjatâju sul sît internet www.comune.udine.it/ccr .