In curt a rivaran in citât nûf cjasis de aghe

In gracie de colaborazion jenfri public e privât, in curt a Udin a rivaran nûf cjasis de aghe che a slargjaran ator pe citât e pai siei borcs il servizi di distribuzion di aghe naturâl e gasade. Il progjet, che al nas dal acuardi jenfri il Comun e la marcje privade “Chiara Acqua”, al è stât presentât vuê di matine, dal sindic Furio Honsell, compagnât dai assessôrs Alessandro Venanzi e Enrico Pizza, e dai imprenditôrs Daniele Nonino e Livio Busana. La iniziative e permetarà duncje ai citadins udinês di gjoldi di chest servizi za a tacâ dal 2014 cence nissune spese pe aministrazion comunâl. Lis cjasis de aghe a saran tiradis sù alì dal parc Foni (ex Moretti), in plaçâl Diacono, tra lis viis San Daniele e Ampezzo, in vie Bariglarie jenfri Godie e Beivârs, tra lis viis Joppi e San Rocco, in vie Chisimaio, in viâl Vât, in vie Basaldella, in vie Piutti e in vie Del Bon. Se si calcole trop che si spint par lâ a comprâ lis butiliis di aghe, chest servizi al permet ae citadinance udinese un sparagn potenziâl di sù par jù 10 mil euros in dì, cence dismenteâ che cul tornâ a doprâ lis butiliis si à un vantaç ancje pal ambient. Lis cjasis de aghe però, al à ricuardât il sindic, no ufrissin dome aghe potabile, ma ancje une ocasion par socializâ, cemût che a fasevin une volte intai borcs lis fontanis.