Ai 21 di Otubar si scree a Udin il prin “Fab Lab” regjonâl

Tra i 21 di Otubar e i 7 di Novembar, il Comun e la Confartesanât di Udin, inte suaze de manifestazion Future Forum, a ufrissin il prin esempli in regjon di “Fab Lab”, un spazi indotât di diviers struments computerizâts in stât di produsi, in maniere flessibile e semiautomatiche, une largje rieste di ogjets. Par fâlu la aministrazion comunâl e à metût a disposizion dai spazis in vie Stringher. Il “Fab Lab” udinês al previôt un calendari siôr di incuintris e di laboratoris che a saran screâts lunis ai 21 di Otubar, a sîs sot sere. Si trate di une iniziative gratuite e vierte a ducj, ma indreçade massime ai zovins e ai professioniscj. Tantis lis ativitâts in program: si va de robotiche ae progjetazion di aplicazions, dal ûs de plateforme Arduino ae stampe in 3D. L’interès pe iniziative al è une vore alt e lis prenotazions a son za plui di 120. Par notâsi baste lâ sul sît www.udine3d.it/fablab o telefonâ alì dal PuntoInforma dal Comun al 0432 414717.