Vinars al partìs il marcjât bio in vie Portanuova

La buine voie di un grup di comerciants e la disponibilitât de aministrazion comunâl a son daûr de iniziative che e vûl dâi gnove vite ae aree dulintor di vie Portanuova e che si invie vinars ai 25 di Otubar. Par rispuindi ai disasis leâts al cantîr par fâ sù l’autoparc sot tiere in Zardin Grant, public e privât si movin adun par rilançâ cheste part de citât a partî propit dal passaç che de place al mene in centri che al restarà viert ancje intant dai lavôrs. Si à duncje metût jù un calendari siôr di apontaments par clamâ dongje turiscj e udinês. Par mês a dilunc la aree a cjaval tra Zardin Grant, place S. Cristoful, rive Bartolini e il palaç ex sede de Bancje de Italie i darà acet a concierts, presentazions di libris, animazions par fruts, spetacui, incuintris informatîfs e tant altri. A screâ chest calendari al sarà il marcjât biologjic che si tignarà dilunc di vie Portanuova e de androne della Banca vinars ai 25 di Otubar a tacâ di 3 e mieze dopomisdì (15.30). Une disine di produtôrs biologjics che a partegnin ae Aiab (Associazion taliane agriculture biologjiche) a metaran fûr i lôr prodots: pan, dolçs, mîl, vins, ûfs, ortaie, pomis, formadis, salums, ma ancje essencis e cosmetics. Il marcjât bio al tornarà po ogni vinars fin ai 27 di Dicembar (fale il prin di Novembar) inte fasse orarie tra 3 e mieze e siet sot sere (15.30 – 19.00). Ae scree dal marcjât al parteciparà ancje l’assessôr comunâl Alessandro Venanzi, intune cui rapresentants de Aiab e cui comerciants de aree.