Infuartît il sisteme di sigurece dal cimitieri di S. Vît

A son rivâts insom i lavôrs par incressi il sisteme di videocontrol alì dal cimitieri comunâl di S. Vît. In plui des gnovis telecjamaris e dai sensôrs colegâts cu la centrâl operative des fuarcis di polizie, a son stadis aumentadis ancje lis lûs alì des jentradis. Cun di plui cumò a son in vore ancje altris misuris che a permetin di limitâ l’acès intes fassis oraris di sierade dal cimitieri. Pai intervents il Comun al à spindût sù par jù 20 mil euros. Dopo dai fats di cronache nere che a àn indignât i udinês e che no jerin mai capitâts prime – al à dite l’Assessôr pal ambient Enrico Pizza – si à rivât pardabon in timps curts a miorâ il sisteme di sigurece intal cimitieri principâl de citât. La Aministrazion comunâl e ponte cumò a infuartî in curt ancje i sistemis di sigurece in chei altris cimitieris dal Comun.