La Ore des storiis ator pes bibliotechis des Circoscrizions

La “Ore des storiis” e tache il so percors a torzeon pes bibliotechis des Circoscrizions cun “Io me la gioco”, il modul dedicât al zûc e es storiis par zuiâ. Il prin apontament al è in program miercus ai 30 di Otubar a cinc dopomisdì (17.00) alì de biblioteche de Seconde Circoscrizion, in vie Martignacco 146. Il modul, imbastît adun cu la Ludoteche comunâl, al à chê di cubiâ lis storiis e il zûc, ven a dî doi dai elements di fonde pe cressite armoniose dai fruts. Intai prossims mês i incuintris a tocjaran ancje chês altris bibliotechis di circoscrizion: ai 27 di Novembar l’apontament si tignarà alì de biblioteche de Circoscrizion Cormôr – S. Roc; ai 29 di Zenâr alì de biblioteche de Circoscrizion Laipà – S. Gotart; ai 26 di Fevrâr alì de biblioteche de Circoscrizion di Udin Sud; ai 26 di Març alì de biblioteche de Circoscrizion di Cussignà; ai 23 di Avrîl alì de biblioteche de Circoscrizion di S. Pauli – S. Svualt; e ai 30 di Avrîl alì de biblioteche de Circoscrizion di Cjavrîs – Padier. La partecipazion e je libare e sore nuie, e e je indreçade massime ai fruts tra i 4 e i 8 agns. Par altris informazions su lis ativitâts de sezion par fruts e fantats de biblioteche civiche si pues telefonâ al 0432 271585 o lâ sul sît internet www.sbhu.it/udine/ragazzi.