Honsell a Strasburc pal Congrès des autoritâts locâls

Vuê martars ai 29 di Otubar a Strasburc il sindic Furio Honsell al cjape part al incuintri dal Congrès des autoritâts locâls e regjonâls dal Consei de Europe dedicât al teme “La Europe in crisi – Lis sfidis pe democrazie locâl e regjonâl”. Il sindic de capitâl dal Friûl al è stât invidât par ilustrâ lis buinis pratichis metudis in vore dal Comun par fâi cuintri ae crisi economiche ancje dentri dal progjet european Urbact. O presentarai al Consei diviersis iniziativis che o vin tacât za tal prin mandât, al à dit Honsell, in particolâr i progjets puartâts indenant dal ufici “Citât Sanis” su la salût, sul invecjament atîf e su la cualitât de vite tant che “Camminamenti”, “Vivere i parchi”, “No alla Solit’Udine”. Si presentarà ancje la adesion dal Comun al pat dai sindics e lis politichis pai zovins che a son in program par chescj cinc agns, tant che lis borsis di lavôr, i tirocinis e “Fab Lab” che al è daûr a davuelzisi propit in chestis zornadis. Il Congrès european, in program tra i 29 e i 30 di Otubar, al viodarà la partecipazion di aministradôrs locâi e regjonâi che a rivin ancje di Albanie, Danimarcje, Ongjarie, Irlande e Ucraine.