Inviade la gnove campagne cuintri de influence

Si è inviade vuê la gnove campagne cuintri de influence de Aziende pai Servizis Sanitari dal Friûl di Mieç indreçade massime aes personis che a àn plui di 65 agns o che, ancje se plui zovinis, a patissin di patologjiis, tant che malatiis respiratoriis cronichis, cardiopatiis o diabete, che a incressin la probabilitât di complicazions leadis ae influence. La vacine e ven ufierte a chestis categoriis sore nuie alì dal miedi di famee o alì dai ambulatoris de Aziende Sanitarie. Chest an, par facilitâ cui che al à problemis di lavôr, si à decidût di garantî il servizi ancje lis sabidis 9, 16 e 23 di Novembar e 7 di Dicembar di vot e mieze a undis e mieze di buinore (8.30-11.30) alì de sede centrâl dal dipartiment di prevenzion a Udin, in vie Chiusaforte 2. La vacine e ven ufierte sore nuie ancje a operadôrs sanitaris, personâl di assistence e adets a servizis publics di interès coletîf primari. Par vê plui informazions si pues telefonâ alì dal dipartiment di prevenzion de Aziende Sanitarie ai numars 0432 553266 e 0432 553995. La campagne e previôt ancje la distribuzion di volantins informatîfs e di manifescj coinvolzint, in plui de Aziende Sanitarie, dal Comun e dai farmaciscj, ancje lis associazions di categorie, lis buteghis di vicinance e i locâi des areis periferichis de citât. La presentazion de campagne si è tignude vuê a palaç D’Aronco ancje cu la partecipazion dal sindic Furio Honsell e de assessore pe salût e pe ecuitât sociâl Simona Liguori.