Comun premiât pes buinis pratichis ambientâls

Udin e je tra lis primis cinc citâts a nivel talian inte classifiche di Legambiente su lis miôr buinis pratichis mantignudis intai agns. Dopo vê otignût il premi talian “Ecositema Urbano” intal 2011, la Aministrazion udinese e à tornât a vê chest ricognossiment par CasaClima, il regolament energjetic che al previôt l’oblic de certificazion in classe B par dutis lis gnovis costruzions e lis ristruturazions totâls. Il premi al è stât ritirât a Bologne dal assessôr comunâl pal ambient Enrico Pizza. “L’obietîf cumò al è chel di no restâ indaûr – al à dite Pizza – parcè che la uniche maniere par lâ dilunc a jessi premiâts su temis tant che ambient e mobilitât e je no restâ mai fers”.