La Crôs Rosse e cjatarà acet alì de dogane di Udin

Al somee dongje di soluzion il probleme de sede dal Comant provinciâl de Crôs Rosse di Udin. Dopo di un confront puartât indenant za di timp, la assessore comunâl pe salût Simona Liguori, e à di fat comunicât che, in spiete de costruzion de gnove sede in vie Brigata Re, a dâi acet ae Crôs Rosse e sarà la struture de dogane di Udin logade in plaçâl de Agricoltura. La propueste fate indenant dal Comun e à za vût il bon acet de direzion provinciâl de Crôs Rosse. Cumò, intai prins 300 metris cuadris dal edifici a cjataran puest la centrâl operative e lis ativitâts di distribuzion che fin cumò a jerin in vie Sabbadini e plui indenant si spostaran achì ancje i ambulatoris e i spazis dai volontaris che in dì di vuê a son logâts alì de Seconde Circoscrizion, in vie Martignacco. Cun di plui, te gnove sede, al è spazi ancje pal autoparc de CRI.