Corot de Aministrazion pe muart di Federico Tavan

“Une muart che e colpìs il mont de leterature taliane e massime di chê furlane, ma o sperìn che la sô opare e puedi lâ dilunc a jessi valorizade parcè che la sô e jere une vôs dal popul sclete, la vôs di un om che al à savût mudâ une tragjedie personâl intune risorse par dute la coletivitât”. Chestis lis peraulis dal sindic, Furio Honsell, tal vignî a savê che usgnot passade al è mancjât il poete Federico Tavan. A pandi il corot de Aministrazion comunâl al è stât ancje l’assessôr comunâl pe culture Federico Pirone. “O vin pierdût un poete vêr, – al à declarât Pirone – un inteletuâl che al à simpri cirût di capî la complessitât dal nestri mont par cambiâlu, cence pierdi mai il gust de ironie e de autoironie”.