A Udin l’Oscar di belanç de aministrazion publiche 2013

Il Comun di Udin al à vinçût la edizion 2013 dal Oscar di belanç de aministrazion publiche che i è stât assegnât cun cheste motivazion: “pe capacitât mostrade intal produsi, in plui dai documents contabii obligatoris, altris rapuarts curâts intai contignûts e inte forme a tacâ dal belanç consolidât 2012, dal belanç di finâl di mandât, dal belanç di gjenar e dal belanç ambientâl”. Il ricognossiment al è stât assegnât vuê a Rome là che a rapresentâ il Comun di Udin e jere la assessore pal belanç Cinzia Del Torre. Il premi al va a chei ents che a àn mostrât di vê metût in vore la miôr rindicontazion economiche, sociâl e ambientâl e la sô comunicazion pronte, eficacie e inovative al public. “Un premi che – e à dite la assessore Del Torre – al rapresente ancje il just ricognossiment pal lavôr di ducj i uficis comunâi”.