Scree uficiâl dal Sissu dopo un an di sperimentazion

Plui di 7.500 contats intun an di ativitât, cuntune medie di 200 utents par setemane, e la acetazion di 1.830 domandis di acès al font pai afits, 1.518 pai contribûts pe tarife di igjiene ambientâl e 130 pal benefici pes fameis numerosis. Al è il belanç in cifris di un an di sperimentazion dal Sissu, o sei il Sportel informatîf dai servizis sociâi udinês screât in maniere uficiâl ai 13 di Novembar cuntun incuintri alì dai locâi dal Centri polifunzionâl Micesio là che a àn partecipât ancje il sindic Furio Honsell e lis assessoris Simona Liguori e Antonella Nonino. Il Sissu al rapresente un pont unic di contat cui servizis sociâi in maniere di evitâ al citadin di domandâ informazions o presentâ domandis a uficis diferents. Par esempli, il Sportel al ricêf lis domandis par acedi ai beneficis sociâi, al fâs ativitât di prime scolte, al ufrìs informazions sui servizis sociâi e al jude l’acès aes rêts teritoriâls dal stât sociâl. Il Sissu al è viert al public di lunis a vinars di nûf mancul un cuart di buinore a misdì e un cuart (8.45 – 12.15) e intai lunis ancje intal dopomisdì di trê e un cuart a cinc mancul un cuart (15.15 – 16.45). Par informazions si pues telefonâ ai numars 0432 271731, 271732, 271733 o 271734, o scrivi ae direzion di pueste eletroniche sissu@comune.udine.it.